Элӗк районӗнчи Ҫирӗккассинче пурӑнакан Раиса Михайлова хӑйӗн укҫипе ҫӑлкуҫа хӑтлӑлатнӑ. 94 ҫулти кинемей пӗччен ӗҫлемен, ӑна ялти ҫынсем пулӑшнӑ.
Ӗҫе ҫуркунне тытӑннӑ. Раиса Михайлова ҫӑлкуҫа хӑтлӑлатма шутласан ял ҫыннисем те алӑ панӑ. Укҫине вара кинемей никамран та пухман, хӑйӗнне кӑларса панӑ. Пӗрисем стройматериал илсе килнӗ, теприсем ӗҫленӗ. Кӗркунне тӗлне ҫӑлкуҫа хӑтлӑлатса пӗтернӗ. Халӗ унта кӳршӗ ялсенчи ҫынсем те чӑмса тухма килеҫҫӗ.
Ҫынсем каланӑ тӑрӑх, унти шыв сиплӗ. Купол 100 пин тенке кайса ларнӑ. Раиса Михайловна укҫине шеллемен, веҫех тӳленӗ. Ӑна вӑл нумай вӑхӑт пухнӑ. Кӑҫал РФ президенчӗ Ҫӗнтерӳ кунӗнче тыл ӗҫченӗсене панӑ 25 пин тенке те унта такакланӑ.
Элӗк районӗнчи Шоркасси Сорӑм ялӗнче пурӑнакан 58 ҫулти арҫынна ҫынна заложника ярса илнӗшӗн айӑплӗҫ. Унсӑр пуҫне вӗлерессипе 3 хутчен хӑратнӑ, ӗҫри влаҫ представительне хӑратнӑ.
Пӑтӑрмах пӗлтӗрхи ҫурла уйӑхӗн 14-мӗшӗнче, авӑн уйӑхн 5-мӗшӗнче тата юпа уйӑхӗн 7-мӗшӗнче пулса иртнӗ. Ҫавӑн чухне арҫын хӑйӗн килӗнче пулнӑ-ха. Ӳсӗрскер пӗрле пурӑнакан 54 ҫулти хӗрарӑмпа харкашма тытӑннӑ. Алӑ та ҫӗкленӗ, вӗлерессиие хӑратнӑ. Юлашки тӗслӗхре пӑтӑрмах пирки пӗлсен пӗр ял хӗрарӑмӗ йӗрке хуралҫисене евитленӗ.
Пакунлисем вырӑна килсе ҫитсен арҫын алӑка уҫман, полицейскисене кайма хушнӑ. 16-мӗш калибрлӑ «ИЖ-18Е» пӑшалтан алӑк витӗр перессипе, хӗрарӑма вӗлерессипе хӑратнӑ.
Унтан вырӑна Росгвардин спецназӗ тата полицейскисем персе ҫитнӗ. Арҫын пӗрле пурӑнакан хӗрарӑм мӑйӗ патне ҫӗҫӗ илсе пынӑ, полицейскисене ҫаврӑнса кайма ыйтнӑ, ахальлӗн хӗрарӑма вӗлерессипе хӑратнӑ. Унтан вӑл кил ҫывӑхӗнчи вӑрмана тухса тарнӑ. Анчах пакунлисем тытса чарнӑ.
Чӑваш Енри 15 ялта африка чумине пула мӗнпур сыснана вӗлереҫҫӗ. Республика Элтеперӗн йышӑнӑвӗнче палӑртнӑ тӑрӑх, ҫак ӗҫе ҫурла уйӑхӗн 19-мӗшӗччен вӗҫлемелле. Сыснасене вӗлерсе, унсӑр пуҫне сысна ашне те ҫунтарса яраҫҫӗ. Карантин зонине Муркаш тата Элӗк районӗсенчи 15 ял лекнӗ. Унта хир сыснисем африка чумипе чирлине тупса палӑртнӑ.
Сысна пӗтермелли ялсен шутне Элӗк районӗнчи Чӑваш Сурӑм ял тӑрӑхӗнчи Мӑн Шӗвӗш; Муркаш районӗнчи Ҫатракасси ял тӑрӑхӗнчи Ҫатракасси, Очӑкасси, Ҫӗньял Хуракасси, Торинкасси, Шупуҫ, Ятман, Ҫӗньял Очӑкасси; Шетмӗпуҫ ял тӑрӑхӗнчи Катӑкуй, Шетмӗпуҫ; Йӳҫкасси ял тӑрӑхӗнчи Тури Панкли, Вӑрманкас, Анатри Панкли, Нӳрет, Хурӑнкасси ялӗсем лекнӗ.
1 килограмм сыснашӑн хыснаран 119 тенкӗ те 82 пус тӳлӗҫ, 1 килограмм сысна ашӗшӗн — 265 тенкӗ те 47 пус, 1 килограмм шӑмӑсӑр сысна ашшӗшӗн — 335 тенкӗ те 88 пус.
Ҫурла уйӑхӗн 7-мӗшӗнче Элӗк районӗнчи Чулкаҫ ялӗнче пурӑнакан 30 ҫулти арҫын 30-ти пӗлӗшӗ хӗрарӑмӗпе хирӗҫнӗ те ӑна тавӑрма шут тытнӑ. Вӑл мунча пӑлтӑрне бензин сапса шӑрпӑк чӗртнӗ. Ҫурт ҫийенчех ҫунма тытӑннӑ.
Шалта пӗлӗшӗ пулнӑ. Вӑл пиҫсе кайнӑ, сӗрӗмпе наркӑмӑшланнӑ. Хӗрарӑм ҫавӑн чухнех вилнӗ.
РФ Следстви комитечӗн Чаваш Енри следстви органӗсем кун тӗлӗшпе пуҫиле ӗҫ пуҫарнӑ. Ӑна малалла тӗпчеҫҫӗ.
Элӗк халӑх театрӗ халӑх театрӗсен уҫӑ конкурсӗнче ятарлӑ диплома тивӗҫнӗ. «Здесь и сейчас» (чӑв. Кунта тата халӗ) пултарулӑх ӑмӑртӑвне Смоленскри халӑх пултарулӑхӗн облаҫри центрӗ Смоленск облаҫӗнчи культура департаменчӗ пулӑшнипе йӗркеленӗ.
Кунта тата халӗ. Ҫакӑ Станиславский тытӑмӗнче тӗп постулатсенчен пӗри пулса тӑрать.
Театр конкурсне хутшӑнакансен пултарулӑхне куҫӑнсӑр мелпе хакланӑ. Конкурс условийӗнче пӑхса хӑварнӑ тӑрӑх, спектакльсен 60 минутран вӑрӑм пулма юраман.
Конкурса Калмӑк, Коми, Тыва, Чӑваш республикисенчи, Донецк Халӑх Республикинчи, Ставрополь крайӗнчи, Калуга, Пенза, Рязань, Тула облаҫӗсенчи театрсем хутшӑннӑ. Элӗксене (режиссерӗ — Инна Афанасьева) «Культура эткерлӗхне упранӑшӑн» дипломпа чысланӑ.
Элӗк районӗнчи Шапкин ялӗнче пурӑнакан 49-ти, 50-ри, 63 ҫулти арҫынсем тата 60-ти хӗрарӑм пахалӑхсӑр эрех ӗҫсе вилнӗ. Кун тӗлӗшпе пуҫиле ӗҫ пуҫарнӑ.
Следстви пӗлтернӗ тӑрӑх, ҫак ялти тивӗҫлӗ канури хӗрарӑм килте эрех сутнӑ. Утӑ уйӑхӗн 19-21-мӗшӗсенче ҫак ҫынсем унран эрех туяннӑ. Унра вара метил спирчӗ нумай пулнӑ.
Вӗсем ӑна ӗҫсе наркӑмӑшланнӑ та вилнӗ. Ҫитес вӑхӑтра следователь айӑплӑ тесе шутланакан хӗрарӑма тытса чарма суда хутпа тухасшӑн. Пуҫиле ӗҫе малалла тӗпчеҫҫӗ.
Чӑваш Ен Элтеперӗ Олег Николаев шӑматкун Ҫӗмӗрлери территорисем хушшинчи медицина центрӗнче пулнӑ. Республикӑн влаҫ органӗсен официаллӑ порталӗнче пӗлтернӗ тӑрӑх, Ҫӗмӗрле ертӳҫисене халӑха кӑшӑлвирусран прививка тӑвас ӗҫе начар йӗркеленӗшӗн сӑмах лекнӗ.
Юлашки кунсенче пирӗн республикӑра талӑксерен 8 пин ҫын прививка тутарасшӑн иккен. Унччен ҫак цифра 4 пинпе танлашнӑ. Ҫавна май медицина учрежденийӗсенче черет вӑрӑмланнӑ. Апла пулсан ӗҫе ҫӗнӗ лару-тӑрӑва кура йӗркелеме тивет.
Паянхи куна илсен Ҫӗмӗрлере кунсерен 350 ытла ҫынна вакцинацилеме пулать, анчах чи хӗрӳ вӑхӑтра та кунсерен 160 ҫын ҫеҫ прививка тутарнӑ.
Элтепер шухӑшланӑ тӑрӑх, халӑхпа ытларах ӗҫлемелле, кӑшӑлвирусран епле хӳтӗленмелли ҫинчен ытларах каласа кӑтартмалла. Ҫӗмӗрлере е ытти муниципалитетра вакцинаци валли хушма бригада кирлӗ пулсан унта ытти ҫӗртисене яма пулать тесе палӑртса хӑварнӑ Олег Николаев.
Канаш хулинче, Красноармейски тата Хӗрлӗ Чутай районӗсенче вакцинаци витӗр халӑхӑн 40 ытла проценчӗ тухнӑ. Ҫӗнӗ Шупашкарпа Улатӑр хулисенче, Вӑрмар, Тӑвай, Элӗк тата Улатӑр районӗсенче прививка тутарнисен хисепӗ 30 процентран сахалрах.
Ҫӗртме уйӑхӗн 26-мӗшӗнче 22 сехет те 10 минутра Элӗк районӗнчи Юманлӑх ялӗ ҫывӑхӗнче авари пулнӑ. Унта «Ладӑпа» КамАЗ ҫапӑннӑ.
Ҫӑмӑл машинӑн водителӗ тата пассажирӗ, шел те, вилнӗ. Малтанлӑха пӗлтернӗ тӑрӑх, «Лада» водителӗ ҫул пӑрӑнӑшӗнче транспорт хирӗҫ килекен ҫул ҫине тухса кайнӑ та КамАЗпа ҫапӑннӑ.
Водитель 39 ҫулта пулнӑ, пассажир – 35-ре. Вӗсем авари вырӑнӗнчех сывлама пӑрахнӑ. Иккӗшӗ те Ҫӗмӗрле районӗнчен пулнӑ.
Шупашкарти пӗтӗм тӗнчери кинофестиваль пуҫланиччен пӗр уйӑхран та катӑлчӗ. Вӑл ҫӗртме уйӑхӗн 21-25-мӗшӗсенче пулӗ. Вӑл районсемпе хуласенче те иртӗ.
Унта Раҫҫейре ӳкернӗ фильмсемпе пӗрлех Индире, Беларуҫра, Польшӑра, Францире, Чехинче тата Данире калӑпланисене кӑтартӗҫ.
Этника тата регионсенчи кино программине Чӑваш Енри, Чечняри, Калмӑк Республикинчи, Пушкӑртстанри, Бурят Республикинчи, Якут Республикинчи, Хакас Республикинчи, Тутарстанри, Байкал тӑрӑхӗнчи, Свердлов облаҫӗнчи тата Тыва Республикинчи 17 ӗҫ кӗнӗ.
Кинофестиваль программинчи фильмсене Шупашкарта ҫеҫ мар, Ҫӗнӗ Шупашкарта, Канашра, Ҫӗмӗрлере, Сӗнтӗрвӑрринче, Шупашкар, Патӑрьел, Вӑрмар, Пӑрачкав, Куславкка, Хӗрлӗ Чутай, Йӗпреҫ, Вӑрнар, Элӗк районӗсенче пурӑнакансене те тӳлевсӗр кӑтартӗҫ.
Чӑваш Енри районсене ҫулпа ҫыхӑнтарасшӑн. Ҫакӑн пирки республикӑн Транспорт тата ҫул-йӗр хуҫалӑхӗн министерствин коллегийӗн анлӑ ларӑвӗнче пӗлтернӗ.
Владимир Осипов министр хӑйӗн докладӗнче палӑртнӑ тӑрӑх, регионти ҫулсене урапа ҫулӗпе ҫыхӑнтарнине пӗтерсе асфальт сарасшӑн.
2021 ҫулта Сӗнтӗрвӑррипе Куславкка районӗсене ҫыхӑнтаракан муниципалитетсем хушшинчи ҫула сарассипе ҫыхӑннӑ проекта хатӗрлесе пӗтермелле. Приоритетлӑ тепӗр объект — Элӗк тата Хӗрлӗ Чутай районӗсене асфальт ҫулпа ҫыхӑнтарасси.
+2.3 °C